ھندوستانءِ سرا اروش و پانی پٹءِ سیمیجنگ.

ھندوستانءِ سرا اروش و پانی پٹءِ سیمیجنگ

 بلوچستانءِ تاریخ

بیسؤک: میر گل خان نصیر

 رجانکار: ناصر محتشمی

نگیج کتگ: 1-7-2006

وھدیکہ شاھزادہ تیمور سردار جھار و نوابنجیب الدولہءِ ھال پہ احمدشاہ سر کت اَنت، سک پریشان بوت و بازین ھال و ھبرے تیمورءَکتی و مزنین لشکرے مُچی کت و  پشاور شت ـ احمدشاہ ابدالی پہ میر نصیرخانکاگدے نبشت کہ منءَ گوں وتی بلوچی لشکرءَ کمک بہ کں ـ میرنصیرخان گوں وتی ملکءِکار و باراں دست گٹ اَت، بلے گوں میرعبدالکریم خانءِ سروکیءَ  چہ ساراوان وجھالاوان دہ ھزار زھم جنین بلوچ جم بوت و احمدشاہ ابدالیءِ مدتءَ رھادگ گپت اَنت ـپنڈیءِ دمگاں میرعبدالکریم خاں گوں وتی بلوچی لشکرءَ  احمدشاہ ابدالیءِسپاہءَ گوں دوچار کپت اَنت ـ

چہ مرھٹانی نیمگا داتا پٹیل اٹکءِ تیابءِبمپان اَت ـ وھدیکہ داتا پٹیل چہ احمدشاہ ابدالیءِ لشکرءِ آیگءِ ھالا سرپد بوت، سکترس اِت و ابید چہ جنگ و دیم پہ دیمیءَ دھلیءِ نیمگا تتک و شت ـ اے وھدا آدینہ بیگمرتگ اَت ـ وھدیکہ عمادلملک غازی الدین خان سرپد بوت کہ احمدشاہ ابدالی اروش کتگ،آیی چہ دومی عزالدین محمد عالمگیرءِ ترسءَ کہ بلکے منی ھلاپءَ چست ببیت، ھمادمانءَ دھلی پتراِت دومی عزالدین محمد عالمگیر و انتظام الدولہءَ گپت و کشت اَنت وپدا یک سرمچار و زھم جنین لشکرے جانکوجی سندھیاءَ داتی و پیسری کت و وتی جندی گوںپشکپتگیں مرھٹانی تپاکیں لشکرءَ پہ احمدشاہ ابدالیءِ دیم پہ دیم بیگا چہ دھلی درکپت ـ

جانکوجی، جمنا کورا گوازینت گنج پورہءَگوں داتا پٹیل کہ چہ اٹک جستگ اَت دوچار کپت ـ وھدیکہ آیی داتا پٹیلءِ پریشانینھال دیست، جانکوجیءِ دلءِ تھا احمدشاہ ابدالیءِ لشکرءِ ترس ھم نشت و پیش کنزگءِجراتی نہ بوت ـ آییءَ داتا پٹیل گوں وت داشت و گنج پورہءَ اردو کت و لشکرءِ چپ وچارگردءَ کانال کشی کت و احمدشاہ ابدالیءِ لشکرءِ ودارا نشت ـ

احمدشاہ ابدالی سندءِ کور گوازینتشاھزادہ تیمور و جھان خانءَ لشکرءِ پیشی " خط مقدم یا مقدمہ الجیش " کتو رھادگ کت اَنت، و آییءِ جند گوں پشکپتگین لشکرءَ رھادگ گپت اَنت و لاھوراِش گپتو خواجہ میرزاجان کہ لاھورءِ حاکم اَت دزگیر کت و کشت اِش ـ چہ اِدا رھادگ گپتاَنت و گوں جانکوجی و داتا پٹیل دیم پہ دیم بوت اَنت ـ بدلیءِ ھندءَ احمدشاہابدالیءِ لشکر گوں مرھٹانی لشکرءَ دیم پہ دیم بوت ـ داتا پٹیل جنگءِ تھا کشگ وجانکوجی ٹپی بوت جست و مرھٹانی لشکرءَ ھم پروش وارت ـ

وھدیکہ غازی الدین خان چہ جانکوجیءِ پروشوارگءَ سھی بوت، سک ترس اِت و پشتءَ کنزاِت و  دھلی آتک کہ احمدشاہ ابدالیءِلشکرءِ دیما بگرایت کہ دستی پہ دھلی مہ رسیت، بلے احمدشاہءِ بیم ھنچو آییءِ دلءَپتراِتگ اَت پیش چہ اِش کہ احمدشاہءِ لشکر دھلی بہ رسیت، غازی الدین خان دھلیءَویل کتگ و تتکگ اَت ـ احمدشاہ سوبین و سربلند دھلیءَ پتراِت و تاراج کنگا لگ اِت،تا سے روچا دھلی تاراج بوت و چارمی روچا دھلی مردمان آسودگ بوت اَنت، بلے ابید چہلوگانی ھشتاں دگہ ھچی پشت نکپتگ اَت ـ

سورج مل وتی درستین ھست و نیستءَ یک جاھےکل کتگ اَت و آ جاہءِ نامی آرام کدہ نامینتگ اَت ـ وھدیکہ احمدشاہ چہ دھلی چٹ اِتدیم پہ اے کلاتءَ رھادگ گپت ـ سورج مل کلاتءِ باھوٹ اَت ـ احمدشاہ کلاتءِ چپ وچارگردءَ گپت و تا شانزدہ روچءَ ھمے ڈولا داشت ـ ھبدھمی روچءَ سوبین بوت کلاتآییءِ دستا کپت و سورج ملءِ ھست و نیست و مال و متاہ احمدشاہءِ دستا کپت اَنت ـ

اے وھدا ھندوستانءَ بشی ھورانی موسم اَتـ ھر گورا ھور و آپ اَت ـ پہ لشکرءَ اے دیم و آ دیم بیگ مشکل اَت ـ اَنوُپءِ شھرءَلشکرا اردو کت، چہ وشیں موسمءِ آیگءِ وھدا اَپساں رست و پزور بوت اَنت، لشکرءَ ھمدمءِ ساسارگءِ موہ رست ـ

وھدیکہ دکنءِ مرھٹاں چہ جانکوجی سندھیاءِپروش ورگ و داتا پٹیلءِ کشگءِ ھالا سرپد بوت اَنت، سک ھژم گپت اَنت ـ گوں بالاجیپیشوانے بھاوجی، وشواس راو، شمشیر راو و جانکو راوءِ سروکیءَ یک دلیر و جنگولیںلشکرے مُچ و یکجاہ بوت ـ بلے اے رندا ابید چہ مرھٹانی لشکرءَ دہ ھزار سوار گوں دگہدھزار نپری لشکرے و یک ھزار نپر گوں توپاں، گوں انگریزی افسران و توپداران منظم ومرتب مرھٹانی ھمراہ اِتنت ـ ابید چہ اِشان کساس سیسد ھزار سوار و پیادگ چہ مرھٹانگوں اے لشکرءَ گون اِتنت ـ  اے ڈڈ و بھادریں مرھٹانی لشکر مُچ بوت و رھادگگپنت اَنت ـ

میرنصیرخانءِ آیگ

وھدیکہ احمدشاہ ابدالی چہ مرھٹانی اےبلاھیں لشکرءِ چن و لانچءَ سھی بوت، آیی پہ میرنصیرخان بلوچ و اوگانءِ خانان کاگدےنبشت کہ لشکرے جم کننت و راہ بدینت ـ گوں اے ھالءِ رسگا میرنصیرخان وتی سردارانءَلشکرءِ جم کنگءِ حکم دات ـ یک ماھے تھا کساس پانزدہ ھزار بلوچ گوں میرنصیرخانءِحکمءَ و آییءِ بیرکءِ چیرا مچ بوت اَنت ـ میرنصیرخان اے لشکرءَ گوں آیانی سردارنیسروکیءَ زرت و پہ احمدشاہ ابدالیءِ کمکءَ دیم پہ دھلی رھادگ گپت ـ چہ سند و پنجاپگوست اَنت، انوپءِ شھرءَ کہ احمدشاہ داشتگ اَت، میرنصیرخان گوں آیی دوچار کپت ـ

 مرھٹاں دھلیءَ گپت

 بشءِ موسم کہ گوست ھور و ھار کمتربوت اَنت، پدا احمدشاہءَ وتی شاد و سوبین لشکر زرت دیم پہ جنگءَ شت ـ  وھدیکہغازی الدین خان و سورج مل جاٹ چہ مرھٹانی لشکرءِ آیگا سرپد بوت اَنت، وتی لشکراِشچہ نوک مچ و یکجاہ کت ـ مرھٹاں کہ کہ نزیک دھلی رس اِتنت، غازی الدین خان و سورجمل جاٹ ھم گوں آیاں ھور بوت اَنت و دھلیءِ سرا اروش اِش کت ـ یعقوب علی خان افغاناے وھدی دھلیءِ حکم اَت، آیانی دیما داشتی نکت و چہ دھلی تتک و وتی پہ احمدشاہءِلشکرا رسینت ـ مرھٹاں دھلیءَ گپت و وتی دستءَ کت ـ

رند چہ دھلیءِ گرگا گنج پورہ ھم مرھٹانیدستا کپت و سردار عبدالصمدخان ھشت تگزئی، میاں قطب شاہ و نجابت خان گنج پورہءِسروک دزگیر و آیانی گردنان جنگ بوت اَنت ـ احمدشاہ چہ اے ھبرے اشکنگءَ سک ھژم گپت،ارادہ ای کت کہ چوش کہ گرند و توپانے دژمنءِ سرا ایر بییت ـ بلے دیما جمناءِ کورمستیں لیڑہءِ پیما مست اَت ـ احمدشاہ حکم دات کہ چہ کورا بگوزاِت و گشتی ھر سوارےیک پیادگے گون وت سوار بکنت و چہ کورا بگوازینیت ـ بھادریں لشکرا حکم منّ اِت وجمناءِ سینگا درّان کنان بوت اَنت و کورءِ آ کرّا مرھٹانی یک رمبی بمپان اوشتاتگاَت و احمدشاہءِ لشکرءِ سرا  تیرگواران اِش کت ـ بلے بھادریں احمدشاہءِ وآییءِ سرمچارانی دلءَ ترسے ھم نکپت ـ جمناءِ مستیں موجان و دژمنءِ سھریں گونڈلاںاوگانءِ لشکرءَ و بلوچ سرمچارانی سینگان درّان اِتنت بلے آیاں ھما پیم جمناءِ کورا گوازینت و آ دیما در آتک اَنت و ھنچو کہ ازرائیل آیانی جانءَ کپت اَنتـ مرھٹاں پہ وتی نجات دیگا تتک و شت اَنت و سدانی لاش جمناءِ کورا کپتنت و گون وتیھونءَ جمناءِ کوراش رنگی کت و احمدشاہ گوں وتی لشکرءَ کورءِ آ دیم در آتکنت و داشتاِش ـ

وھدیکہ مرھٹاں سھی بوت اَنت کہ احمدشاہجمناءِ کورا گوازینتگ وتی دو دلیں لشکراِش زرت و چہ گنجپورہ درآتک اَنت و یک ڈنےسرا پانی پٹءِ دمگءَ اردواِش کت گدان و خیمہ اِش جت و نشت اَنت و وتی چپ و چاگرداخندق اِش جت و دژمنءِ ودارا نشت اَنت ـ

دومی روچا احمدشاہ دہ ھزار اَپس سوارسردار جھان خانءَ دات و یک جنگے تھا داشت اَنت کہ دژمنءَ چہ پشتءَ بجن اَنت و وتیجندی چہ دیما اروش برت کہ دژمنءِ کچ و کساسءَ بچکاسیت ـ اے اروشءَ احمدشاہ زوتسرپد بوت کہ دژمنءِ لشکر سک مزن اِنت و نہ لوٹ اَنت ڈن چہ خندقاں جنگ بکن اَنت ـپہ اے ھاترا احمدشاہ سلاہ زانت کہ ھداروکی وتی لشکرا پشتءَ بکنزینیت ـ بلے مرھٹانوتی بازیں لشکرءَ دیست عقل اِش کور بوت، ھیال اِش کت کہ بلکیں احمدشاہ پروش وارتگو پشتءَ کنزیتگ ـ پہ ھمے ھاترا چہ خندقاں در آتک اَنت و بے پرواہ احمدشاہءِ پداکپت اَنت ـ اے وھدا سردار جھان خان موہ کت گوں دہ ھزار سوارا  اناگاہ چہ پشتءَاروش برت و مرھٹان اِش محاصرہ کت ـ گوں اے اناگاھیں و پشتی اروشءَ مرھٹانی سرءِھوش شت و شنگ و شانگ بوت اَنت ـ احمدشاہ ھم موہ کت و آیانی سرا اروش کت، ھما یکیںساھتءَ ھپت ھزار کس چہ مرھٹاں کشگ بوت ـ پشت کپتگین لشکرءَ وتی ھپت ھزاریں لاشرمبینت اَنت و پدا خندقانی تھا پترت اَنت ـ خلاصہ تا یک ماھے اے دویں لشکراں پانیپٹءِ تاریخی جنگی میدانءِ سرا داشت اِش و ھمک روچ جنگ اِش دات ـ بلے کسءَ چشیں ھمتنیست اَت کہ دیما بکنزیت و فیصلہ کنوکیں جنگے بنگیج بکنت ـ احمدشاہءِ لشکرءَمرھٹانی چپ و چاگرد گپتگ اَت و بلوچ و اوگانءِ سرمچاراں جنگءِ درستیں راہ شنک کتگاِتنت، کاہ، آپ و توشگ و جنگی ساز و سامانءِ پہ مرھٹانی سپاہءَ نہ پج اِت ـ آسراتنگی و گژنگیءِ نشانی مرھٹانی لشکرءِ تھا گندگ بوت، و نوبت ھما جاہءَ رست کہگژنگیں مرھٹاں وتی اولاک و اپسانءَ کشگ و ورگا لگ اِتنت و دلوتاں ھم مرگا لگ اِتنتـ لشکرءِ اپساں چہ تن و گژنءِ تلسوگااِتنت ـ ھمے وھدی بھادریں مرھٹاں ھیال کت کہدگہ ھرڈولا مرک اِں، گژن و تن ما را کشیت، بھتراِں کہ جنگ بکن اِن، چہ خندقاں درآتک اَنت و گوں احمدشاہءِ لشکرءَ جنگ اِش دات و پہ مردانگی مرت اَنت ـ

فیصلہ کنوکیں جنگ

جنوری 1761 ءَ جنگءِ طبل توار کت ـمرھٹاں چہ خندقاں در آتک اَنت و پانی پٹءِ میدانءَ صف اِش کش اِت ( صف آرا ) ـ اَنگت بامگاہءِ سھری آزمانءَ گندگ بوت کہ برباد کنوکیں جنگءِ چن و لانچبنگیج بوت ـ ھما دمانءَ پانی پٹءِ میدانءَ لاش لاشءِ سرا کپت ـ بھادریں اوگان وشیردلیں بلوچاں ھندوستانءِ نام آوریں سورماؤاں و زحمت کشیں مرھٹانی تھا کپت اَنت وگوں ھنچیں بے پرواھی و بے رھمی ئے جنگ اِش کت کہ ھورانی جو رھادگ گپت ـ جنگءِ اول سرا سردار عنایت خان ھندوستانی کہ احمدشاہءِ مردم اَت، مرھٹانیمحاصرہءِ تھا کپت ـ