Salal Balouch

بلوچی تامر ‘‘ بے مراد ‘‘

رحیم احمد جدگال ءِ سوجکاری ءَ جوڑ بوتگیں تامر کہ مغربی بلوچستان ءَ جوڑ کنگ بوتگ من چار ات 

چو کہ اے تامر ءِ بابت ءَ باز گپّ جنگ بوتگ ءُ باز نبشتہ کنگ ھم بوتگ ۔۔۔ سنگت اقبال زھیر ءَ تامر ءِ بابت ءَ نبشتہ کتگ بازیں مردماں بد برتگ ات ءُ بازیناں ساڑاتگ ات ۔بلوچی تامرانی جوانیں سوجکار ءُ ازمکار سنگت انور غلام ءَ ءُ سنگت فضل حیات ءَ ھم نبشتہ کتگ ات کہ جوانیں تامرے ءُ بازیں مردماں چو ھم نبشتہ کتگ ات کہ ‘‘ مئے تامر کار وتی گھارانی ماں تامراں کار کنگ ئے حق ءَ انت یا ناں بلے اشانی جواب کس ءَ نہ دات ۔ منی جند نہ تامر کارے ءُ نا کسہّ کارے چو کہ گپّ جنگ ھر کسی حق انت پمشکا من ھم دو گپ جنگ لوٹاں ۔۔۔ اولی گپّ ایش انت کہ بلوچی ءَ جوانیں تامر باز اتکگ بلے منی دیما سنگت فضل حیات ءُ سنگت انور غلام ءِ نبشتانک نہ گوستگ انت اشی سبب چے بوت کن انت من زانت نہ کناں بلے منی گوں دوئیں سنگتاں دزبندی انت کہ باید انت کہ ھر جوانیں تامرے کہ کئیت سنگت تامرکارانی دلبڈی ءِ ھاترءَ چیزے نبشتہ بکن انت نوں من کایاں ‘‘ تامر‘‘ نیمگا ۔۔۔ تامر منا دوست بوت جوانیں تامرے ات درستاں وش کار کتگ درست ستا کرزنت من نہ گشاں کہ تامرانی تہا جنک مان مہ بیت بلے یک گپّے ھست اگاں چاروک غیرت مندیں بلوچے بہ بیت چاگرد ءِ سرا ھچ اسر نہ کپیت بلے مئے کرا دگہ وڑنت من زیک چہ سنگتے ءَ جست کت کہ ترا کجام جنک دوستر بیتگ گوشت ئے منا ‘‘ مراد ‘‘ ءِ مستریں گھار مئے کرا ھرابی ھمیش انت بلے ما کہ غیرت مند بہ باں گڑا چاگردی ھرابی ءِ سوال پشت نہ کپیت دومی گپ ایش انت کہ چشیں بازیں چیز ھست انت کہ مئے چاگرد ءِ سرا اسر اش دور داتگ بازیں جنگ ءُ شدّت ھم پاد اتکگ چو کہ موبائل انت ھمے موبائل ءِ سبب ءَ بازیں لوگ تباہ بوتگ انت بلے اے چیز ھر کسی وتی دست ءَ انت ھرچی چیز ءِ دو پہلو انت موبائل تو شر کارمرد کت کنے ءُ ھراب ھم اگاں اے گپّ انت گڑا موبائلانی سرا ھم بندش جنگ بہ بیت ۔۔۔ بلوچی ءَ بازیں تامراں مردیناں جنینی پوشاک گورا دیگ بوتگ داں کدین ءَ مردیناں جنینی پوشاک گورا دئے ؟ یا وتی کسہّ ھنچو نویس کہ جنک ءُ جنین ءِ ضلورت مہ بیت چو کہ ڈاکٹر حنیف شریف ءِ تامر ‘‘ منی پت ءَ برات نیست ‘‘ اے تامرءَ جنینے مان انت ‘‘ جامی ‘‘ ءِ مات انت بلے زاھر نہ انت بلے کسے ءَ کہ تامر چار اتگ آئی ءَ جامی ءِ مات الماّ دیستگ پرچا کہ جامی مات منی ھم مات انت تئی ھم مات انت ھر چاروک ءِ مات انت مات ھرکس ءَ وتی دیستگ منی گپّ مراد ایش انت کہ یا وَ وتی کسہّ ءَ جنین مان مکن یا برداشت بکن ‘‘ بے مراد ‘‘ کسہ منا سک دوست بوت بلے منا کہ ھما چیز دوست نہ بوتاں آ اش انت
تامر چوکہ مغربی بلوچستان ءَ جوڑ کنگ بوتگ ‘‘ مراد ‘‘ ھم مغربی بلوچستان ءِ مردم انت باید انت ‘‘ مراد ‘‘ ءِ گالوار ھم ھمانگری گالوارے بوتیں چو بوت نہ کنت کہ ‘‘ تئی گھار ھمانگری گالوار ءَ گپّ جنت تئی مات ءُ پت ھمانگری گالوارءَ گپّ جننت بلے تئی گالوار کیچی گالوارے یا وَ درستاں کیچی گالوارءَ گپّ جتیں یا ایرانی گالوار ءَ
دومی اے کہ مراد نادراہ انت مراد ءِ سنگت مراد ءِ چارگا کاینت مراد ءِ گھارے ھم ھمدا نندوک انت باید انت گھار پاد بئیت ءُ برؤت بلے اے چشیں مزنیں ردی نہ انت چشیں بلوچی تامر من باز چار اتگ کہ پت ءَ تمپی گالوار ءَ گپّ جتگ چکّ مندی گالوارءَ ۔۔۔۔۔۔۔۔۔۔۔۔۔۔۔۔۔۔۔۔۔ منا امیت انت منی گپاں کس دل ءَ نیاریت